ئۈندىدار ھېساباتىغا پۇل قاچىلاش

uyghurdetal · ۋاقتى: 2016-4-24 14:29:17

ئەسسالامۇ ئەلەيكۇم تورداشلار، بۈگۈن ئۈندىدار ھېساباتىمىزغا پۇل قاچىلاشنى بىلىشىمچە سۆزلەپ باقاي دېدىم، بىلىدىغانلار ئاتلاپ ئۆتۈپ كېتىڭلار، بىلمەيدىغانلار بىلىۋالارسىلەر. كەم قالغان جايلىرى بولسا بىلىدىغانلارنىڭ تولۇقلاپ قويۇشىنى ئۈمىد قىلىمەن.
ھازىر بەزى سودىلار ئۈندىداردىلا ئېلىپ بېرىلىدىغان بولدى، پۇل تۆلىگەندە ئۈندىداردا بىۋاسىتە يۆتكەپ بىرىش ياكى قىزىل بولاق شەكلىدە يۆتكەپ بېرىش دائىم ئۇچرايدۇ. شۇنداق چاغلاردا ئۈندىدار ھېساباتىمىزدا پۇل بولمىسا بۇلارنى قىلىشقا ئامالسىز قالىمىز، ئەلۋەتتە. شۇ سەۋەبتىن بۇ ئاددى دەرسلىكنى سۇندۇم.
مىسال قىلغىنىم ئۈندىدار Android نۇسخىسى ھازىرقى ئەڭ يېڭى نەشرى (6.3.16)
ئۈندىدار ھېساباتىمىزغا پۇل قاچىلاش ئۈچۈن ئاۋۋال ئۈندىدارىمىزغا باغلانغان بانكا كارتىسى بولۇشى كېرەك. بانكا كارتىسى باغلاشنى بىلمەيدىغانلار ئالىم ئەھەت بىلوگىدىكى ماۋۇ ئادرېستىن كۆرۈۋالساڭلار بولىدۇ.
http://www.alimahat.com/?p=4320
ئەمدى ئۈندىدارىمىزنى ئېچىپ مەن (我) نى چېكىمىز.

ئۇ يەردىن پارچە پۇل (零钱) نى چېكىمىز.

قارىساق بىزنىڭ ھازىرقى پارچە پۇلىمىز چىقىپ تۇرىدۇ. ئاستىدىكى قىممەت تولۇقلاش (充值) نى چېكىمىز.

بۇ چاغدا ئۈستىدە ئۈندىدارىمىزغا باغلانغان بانكا كارتىسى چىقىپ تۇرىدۇ. باغلانغان كارتا بىردىن كۆپ بولسا ئۈستىدىن تاللىساق بولىدۇ. ئاستىغا تولۇقلىماقچى بولغان مىقدارىنى (قانچە پۇل تولۇقلىماقچى شۇ پۇل سانىنى) يېزىپ، كېيىنكى قەدەم (下一步) نى چېكىمىز.

بۇ چاغدا بىزدىن ئۈندىدار پۇل تۆلەش پارولىنى سورايدۇ، يەنى بىز باشقىلارغا قىزىل بولاق ئاتقاندا ياكى يىغىلىپ قالغان قىزىل بولاقنى بانكا كارتىمىزغا ئاغدۇرغاندا كىرگۈزىدىغان ئالتە خانىلىق پارول شۇ. شۇنى كىرگۈزۈپ كېيىنكى قەدەم (下一步) نى چېكىمىز.

ئاندىن تۆۋەندىكى رەسىمدەك قىممەت تولۇقلاش ئۇتۇقلۇق بولدى (充值成功) دەپ چىقسا بولىدۇ. ئاندىن تاماملاش (完成) نى چەكسەكلا بولىدۇ.

ئەمدى بايىقى پارچە پۇل كۆرىدىغان يەردىن قاراپ باقساقلا بولىدۇ.

مۇشۇ بويىچە قىلساڭلار بولىدۇ.
ئەسكەرتىش: تېمىنى تەپسىلىي ئوقۇپ مەشغۇلات قىلىڭ. چالا ئوقۇپلا ياكى ئوقۇمايلا مەشغۇلات قىلىپ يولۇققان مەسىلىگە مەزكۇر تور بەت ۋە مەن ئىگە ئەمەس.
مەنبەسىنى ئەسكەرتكەن ھالدا تارقاتسىڭىز بولىدۇ، لېكىن ھەقلىق تارقىتىدىغان، مۇنبەر تەڭگىسىگە ساتىدىغان، ئىنكاسقا ساتىدىغان ئىشنى قىلماڭ.