ئـۆزۈڭـنـى سـۆي، مـەلـىـكـەم

otkankunlar

	ئـۆزۈڭـنـى سـۆي، مـەلـىـكـەم مەلىكەم! توغرا قىلغان ئىشلىرىم ئىچىدىكى ئەڭ توغرىسى، بارلىققا كەلتۈرگەن ئىشلىرىم ئىچىدىكى ئەڭ نادىرى سەن؛ تاللاشلىرىم ئىچىدىكى ئەڭ تەسىرلىك، ئېرىشكەنلىرىم ئىچىدىكى ئەڭ پەخىرلىك نەتىجەم سەن. شۇنداق، ھاياتلىق بېغىمدىكى قىش - ياز ئېچىلىپ تۇرىدىغان ئەتىر گۈلۈم، دائىم لىققىدە مېۋىگە تولۇپ تۇرىدىغان ئالما دەرىخىم سەن. مەلىكەم! مەن سەندىن پەخىرلىنىمەن، چۈنكى زېھنىڭ كۈنسېرى ئۆتكۈرلىشىۋاتىدۇ، ئادەملىك قىممىتىڭ سائەتلەپ مۇكەممەللىشىۋاتىدۇ. بىلەمسەن؟ مۇشۇنداق بەرق ئۇرۇپ تۇرغان چېغىڭدا ئالىم بولۇشۇڭنى، دوكتور بولۇشۇڭنى، ئەلۋەتتە ئۈمىد قىلىمەن. لېكىن، ئادەم بولۇشنىڭ تەقەززاسى ئالىم بولۇش تەقەززاسىدىنمۇ مۇھىم ئىكەنلىكىنى سەمىڭگە سېلىپ ئۆتەي. مەلىكەم! كەلگۈسىدە راستىنلا مەلىكە بولۇشۇڭنى تىلىمەيمەن، لېكىن ئۆز ئەجرىڭ بىلەن مەلىكىلەرنىڭ پاراغىتىنى يارىتىپ ياشىغايسەن! ئاددىيلىق ئىچىدىكى ھېكمەتلەرنى قېزىپ چىققايسەن! ئىشقىلىپ، ئايال بولۇشنى ئۇنتۇپ قالمىغايسەن! ئايال بولۇش ئايالچە كىيىم، ئايالچە سالاپەت بىلەن ئوتتۇرىغا چىقىش دېگەنلىك بولماستىن، بەلكى چىت كۆڭلەك كىيىپ، ھويلا سۈپۈرۈپ، كۈپ توشقۇزۇپ، ئېتىزلىقتا ئەرلەر بىلەن بىللە ئىشلەپ، ئۇزۇن چاچلىرىدەك ئۇزۇن ھايات ياراتقان مومىلارنىڭ روھىنى، خۇددى ئۈجمە دەرىخىدەك مىننەتسىز، تەمەسىز ياشاپ، ھاياتىنى قوۋناقلىققا تولدۇرغان ئانىلارنىڭ روھىنى نۇرلاندۇرۇش دېگەنلىكتۈر! شۇنداق، ئايال بولۇش كىملەردۇر جۆيلىگەندەك گۇمراھلىق ئەمەس... قۇل بولۇشمۇ ئەمەس... يۇقىرى - تۆۋەنلىك دەۋاسى قىلىپ جېدەل تېرىش تېخىمۇ ئەمەس. ئايال بولۇش جاپالىق، مۇشەققەتلىكتەك كۆرۈنگىنى بىلەن چەكسىز پەخىرلىك ئىشتۇر. مەلىكەم! ئايال بولۇش ئانا بولۇش دېمەكتۇر. سەن ئۆز بالىلىرىڭنىڭلا ئانىسى ئەمەس، دۇنيانىڭ ئانىسى بولۇشنى ئۆگەنگىن. مېھرىڭ قۇياشتەك ئىللىق بولسۇنكى، قەدىمىڭ يەتكەنلىكى جاي شادلىققا تولسۇن! سەنسىز قالغاندا، ئۇلار يوقلۇقىڭدىن بىرنېمىسى كەمدەك تۇرسۇن، ھەرگىزمۇ بار ياكى يوقلۇقى بىلىنمەيدىغان ئايال بولۇپ قالمىغىن. مېھرىڭ بىلەن قەھرىڭ ھەر زامان تەييار تۇرسۇن! ئېسىل، گۈزەل نەرسىلەرنىڭ كۈشەندىسى ھەر جايدا ھازىردۇر. شۇڭا ۋۇجۇد - روھىڭدىكى پاكلىق، پاكىزلىق مىسال قىممەتلىك بايلىقلىرىڭنى ھەر زامان، ھەر ماكاندا ئاسراشنى، قوغداشنى بىلگىن. قىلىشقا تېگىشلىك بولمىغان ئىشنى قەتئىي قىلىشقا بولمايدۇ، بولمىسا پاكىز، سۈزۈك كۆل سۈيىگە نىجاسەت چۈشۈپ كەتكەندەك ئىش بولىدۇ. بۇلغانغان ۋۇجۇد، بۇلغانغان روھتا ئادەم مەھلىيا بولغۇدەك ھېچنېمە قالمايدۇ. ئېتىقاد روھنىڭ تۈۋرۈكى، ئېتىقادسىز روھتىكى ۋۇجۇد پۇچەك بولىدۇ. شۇڭا ھەر زامان ئۆز ئېتىقادىڭدىن ئايرىلىپ قالما، ئۇنى بېيىت، قۇۋۋەتلەندۈر. ئەنئەنە بىلەن مەدەنىيەت ئوتتۇرىسىدا گاڭگىراپ قالما. ئېتىقاد مەدەنىيەت بىلەن زىت نەرسە ئەمەس. سەن ئۆز ئېتىقادىڭدىن يىراقلاشمىغان ھالدا ھازىرقى زامان مەدەنىيەتلىرى بىلەن قوراللان. مەدەنىيەت ئۆزلۈكتىن، ئەنئەنىدىن ۋاز كېچىش ئەمەس. سەن ئەقىللىق، زېرەكسەن. نېمىنى قوبۇل قىلىش، نېمىدىن ھەزەر ئەيلەشنى ئەلۋەتتە بىلىسەن. تاشقى قىياپەتمۇ بىر ئادەمنىڭ ئىچكى دۇنياسىنى مەلۇم دەرىجىدە كۆرسىتىپ بېرەلەيدۇ، شۇڭا چاكىنا ۋە ناچار ئىللەتلەر سەندىن نېرى تۇرسۇن! چۈنكى قوغدايدىغان بارچە بايلىقلىرىڭ ئىچىدە تاشقى قىياپىتىڭمۇ، ئۆزۈڭگە ۋە بىزگە باغلانغان ئوبرازىڭمۇ بار. چۈنكى سەن ئۆزۈڭگىلا تەۋە ئەمەس. ۋەتەننىڭ، مىللەتنىڭ، ئاندىن بىزنىڭ پەرزەنتىمىزسەن. مەلىكەم! جېنىم قىزىم! بارچە گەپلىرىم بۇ ئاددىي يازمامدا قارارىنى تاپالمايدۇ. بۇ پەقەت بىر قىسمى. سەن قىز بولۇپ يارالغىنىڭدىن، ئالەمنىڭ ئانىسى — ئايال بولغانلىقىڭدىن پەخىرلەن، ھاياتنى سۆي! ئۆزۈڭنى سۆي! ئۆز قەۋمىڭنى، ئەۋلادلىرىڭنى سۆي! شۇندىلا، ھاياتنىڭ ھەر مىنۇت، ھەر سېكۇنتىنى توغرا ئىشلارغا ئىشلىتەلەيسەن... مەنبەسى:شنجاڭ گېزىتى

مەرۋەرى

	مەن بۇ يازمىنى قىزلىرىمغا بىر ئوقۇتايچۇ:)

گۇلخان

	مەن قىزىمىنىڭ «بەخىت رىسالىسى»گە يېزىپ قۇياي.يازغىلى بىر نەرسە تاپالماي يا ئۈزۈم قاملاشتۇرۇپ يازالماي ،ئۆچۈرۈپ جىجاپ بۇلالماي بەك ئاۋارە بۇلۇپ كەتكەنىدىم.مىنىڭ كۆڭلۈمدىكىنى يېزىپسىز،ئوخشاش قىز بولغاندىكىن مۇشۇنىلا يازايچۇ؟ رەھمەت سىزگە كۈنلەر،:D

hilal

	بەك ئەتراپلىق يېزىلغانكەن ... مەنمۇ ساقلاپ قويۇپ كىيىن كىيىن قىزىم بولغاندا ئوقۇپ بېرىمەن ...

ئايدىل

	ئادەم ئۆزىنى سويۈشنى بىلمىسە باشقىلارنىڭ سۆيۈشىنى ھېس قىلالمايدىكەن ھەم باشقىلارمۇ سۆيمەيدىكەن.

جۇلالىق

	قىزىمغا ئوقۇپ بېرەي، ئۆتكەن كۈنلەر ئاكامدىن رۇخسەت سورىمايلا ساقلىۋالدىم.