ئوغلۇم بولسا مۇنداق تەربىيىلەيتتىم

Qismet

	ئوغلۇم بولسا مۇنداق تەربىيىلەيتتىم      خۇداغا شۈكرى ئوغلۇم، ئاللاھنىڭ شاراپىتى بىلەن يورۇق دۇنياغا كۆز ئاچتىڭ، ئاناڭ ئىككىمىزنىڭ كۆڭۈل قويۇپ تەربىيىلىشى، تېخىمۇ توغرىسى جانابىي ئاللاھنىڭ قەلبىڭگە ھىدايەت نۇرى چېچىشى بىلەن ئېتىقادلىق، غۇرۇرلۇق بولۇپ چوڭ بولۇۋاتىسەن.      مانا ھەش-پەش دېگۈچە ئالتە ئايلىق بولدۇڭ. ئۇخلاپ قالغانلىرىڭدا بېشىڭدا تۇرۇپ، ئاللىقانداق خىياللارغا چۆكىمەن، پىلانلارنى تۈزىمەن...      ئاناڭ ئۆسۈپ يېتىلگەن ئىلى ۋادىسىدا ئويناپ، مەن پەقەت بىر قېتىم ئۈزۈش نېسىپ بولغان ئىلى دەرياسىدا ئۈزۈپ چوڭ بولۇۋاتىسەن. داداڭ جەنۇبنىڭ قۇرغاق مۇھىتىدا جاپاكەش، ئەمما ئېسىل ئىنسانلار ئارىسىدا تۇغۇلۇپ چوڭ بولغان، ئاناڭ ئەركىن مۇھىتلارنىڭ بىرى بولغان ئىلى دىيارىنىڭ قىزى. سەندە مانا مۇشۇ ئىككى ئىنساننىڭ قېنى بار، مۇشۇ ئىككى ئىنساننىڭ گېنى بار. ناھايىتى پەرقلىق ئىككى خىل مۇھىتتىكى ئىككى ئۇيغۇرنىڭ ئوغلىسەن، ئوغلۇم!      ئاناڭ ئېسىل ئايال، ئۇنىڭ ئېسىللىكى مېنى ياخشى كۈتۈشى، ئاتا-ئانىمىزغا پەرزەنتلىك بۇرچىنى ياخشى ئادا قىلىشىدىلا ئەمەس، پەرزەنت تەربىيىسىدىكى يېتۈكلىكىدە ئىپادىلىنىدۇ.      ...      مەكتەپكە كىردىڭ، ئوغلۇم، سېنى مۇشۇ ئەبجەش مۇھىتقا قويۇۋېتىشكە مەجبۇر بولدۇم. ئەگەر ئارمانغا چۇشلۇق دەرمان بولسىدى، سېنى ئۆزۈم تەربىيىلىسەم، ئاناڭ پەرزەنت ئۈچۈن خىزمەتتىن چېكىنسە، ئانا ئۈچۈن ئەڭ چوڭ خىزمەت ھېسابلىنىدىغان پەرزەنت تەربىيىسى ئۈچۈن جان كۆيدۈرسە تېخىمۇ ئېسىل ئىش بولار ئىدى. ئەپسۇس، ئوغلۇم، نۆۋەتتىكى رەھىمسىز رېئاللىق ئالدىدا باش ئېگىشكە مەجبۇر بولدۇم. بۇ دېگىنىم پەرزەنت تەربىيىسىدىن ۋاز كەچتىم دېگەنلىكىم ئەمەس، ئەلۋەتتە.      ئاتا-ئانىلار پەرزەنتلىرىگە «يۈسۈپ خاس ھاجىپتەك، مەھمۇد كاشغەرىيدەك، ئېينىشتىيىندەك ئادەم بول» دەپ تەربىيە قىلىشىدۇ. ياق، ئوغلۇم، ياق. مەندەك-داداڭدەك ئادەم بول. سېنىڭ ئەڭ چوڭ ئۈلگەڭ مەن. سەن ئىنسانلار ئارىسىدىن ئۆزۈڭگە ئۈلگە ئىزدىمەكچى بولساڭ (پەيغەمبەر ئەلەيھىسسالامدىن باشقا) مېنىلا ئۈلگە قىل. پەزىلەتتە، ئادىمىيىلىكتە پەقەت مېنى دورا، چۈنكى سەن مېنىڭ ھاياتىمنى داۋاملاشتۇرىسەن، سەن بولغاچ مېنىڭ نەسەبىم مەڭگۈ ئۈزۈلمەيدۇ.      مەن سېنى ئالىم بول، داداڭدەك كومپيۇتېر خادىمى، ئاناڭدەك تېببىي خادىم بول دېمەيمەن. ئۈمىدىم شۇكى، سەن پەقەت ئادەم بولساڭلا مەن شۇنىڭغا رازى. ئىنسانلار جەمئىيىتىدە ئادىمىيلەر كۈنسېرى ئازىيىۋاتقان مۇشۇ كۈنلەردە، سەندىن تەلىپىم پەقەت بىرلا: ئادەم بول، ئاندىن ئالىم بولىسەن، .... بولىسەن، ئوغلۇم.      پات ئارىدا يىگىت بولىسەن، ھەدىلىرىڭنى ساڭا تاپشۇرىمەن. نېمە؟ ھەدىلىرىمگە مېنى تاپشۇرماي، ماڭا ھەدىلىرىمنى تاپشۇرامسەن دادا، دېدىڭمۇ؟ شۇنداق ھەدىلىرىڭنى ساڭا تاپشۇرىمەن. سەن دېگەن ئەركەك ئوغلۇم، ئەركەكلەر ھەرقاچان، ھەر زاماندا قىز-ئاياللارنى ھامىيلىقىغا ئېلىشى، ئۇلارنى قوغدىشى كېرەك. بۇ ئەركەك زاتىنىڭ باش تارتىپ بولماس مەجبۇرىيىتى.      بىلەمسەن ئوغلۇم، كوچىلاردا يېرىم يالىڭاچ قىز-ئاياللارنىڭ كۆپىيىپ كېتىشى شۇ يالىڭاچ قىز-ئاياللارنىڭلا ئەمەس، ئەركەكلەرنىڭ يارىماسلىقى. مەن سېنىڭ يارىماس ئەركەكلەردىن ئەمەسلىكىڭگە ئىشىنىمەن. چۈنكى ۋۇجۇدۇڭدا مېنىڭ-بىر ئەركەكنىڭ قېنى ئېقىۋاتىدۇ، ئوغلۇم!      پۇرسەت ئىچىدىن پۇرسەت چىقىرىپ سېنى ئۆز مەسلىكىم بويىچە تەربىيىلەۋاتىمەن، تەربىيىلەيمەن، تاكى سەندىن رازى بولغىچە ...      قادىر ئاللاھ سېنى كامىللىققا يەتكۈزگەي، مېنى ئۇلۇغ دادا شەرىپىگە ئىگە قىلغاي!      مەنبە: قىسمەت بلوگى      يازما مەنزىلى: http://www.qismet.me/oghlum.html

مەرۋەرى

	بۇ يازمىنى ئوقۇپ كۆز ئالدىمغا تېخى تۇغۇلمىغان، بىر يەرلىرى سىزگە ئوخشايدىغان، بىر يەرلىرى ماڭا ئوخشايدىغان بىر ئوماق ئوغۇل كەلدى، ئاللاھ شۇ نىيەتلىرىمىزگە تېزرەك يەتكۈزگەي!

tiwix

	ئوغۇل  ھەقىقەتەن ئەگەر  دادىسىغا  ھەۋەس قىلسا ، دوسلىرى ئالدىدا ئىپتىخارلىنىپ تۇرۇپ  مېنىڭ دادام ئانداق مېنىڭ دادام مۇنداق دەپ دادىنىڭ كىچىككىنە  ئىشلىرىنىمۇ تىلىدىن چۈشۈرمەي يۇرسە  ، ئۇنى ئۆزىگە ئورنەك قىلسا  بۇ دادا  تولىمۇ مۇۋاپىقىيەت قازانغان دادا  بولغۇسى ...... لىكىن ھازىرقى جەمىيىتيىمىزدە  بالىلىرىغا  مۇشۇنداق ئىپتىخارلىنىش تۇيغۇسى بېرەلەيدىغان دادىلاردىن قانچىسى باركىن

leyli

	مۇبارەك بولسۇن قىسمەت ئەپەندى ، مەرۋەرى خانىم ساپ نىيەتلىك كىشىلەرنىڭ پەرزەتلىرى مەيلى قانداق تەربىيە كۆرسۇن ساپ دىللىرىنى يوقاتمايدۇ ، ئاللاھ شۇ گۈزەل تىلەكلىرىڭلارغا تېزرەك يەتكۈزسۇن

مەرۋەرى

	رەھمەت ئەزىزلىرىم! ئاللاھ مۇشۇنداق خوشاللىقلارنى ھەممىمىزگە ئاتا قىلسۇن

tiwix

	سىلەرنىڭ مۇھەببەت  جەۋھىرىڭلار بولغان ئەركەكتەك  ئەركەكنىڭ پات  دۇنياغا  كېلىشىنى  ئۇلۇغ ئاللادىن  تىلەيمەن

xakilat

	بىر ئاتىنىڭ ئارزۇسى... ئاللاھ ئارزۇيىڭىزغا تېزرەك يەتكۈزسۇن، ئىمانلىق، قەيسەر، ئەركەكتىن بىرىگە ئاتا بولۇشقا نىسىپ قىلغاي!

anar

	پاھ !!!!بىركۈن مۇنبەرگە كىرمىسەم ئۇغولدىن بىرى ئاپىرىدە بولدىما ؟؟؟ مۇبارەك بولسۇن !ئاللاھ شۇنداق بۇدرۇققىنە ئوماقتىن بىرىنى ئاتا قىلسۇن!

ئەزىزتارىم

	ئەسسالام قىسمەت ئەپەندىم ،مەۋرەرى خانىم، كەمىنە ئەزىزتارىم دىن سىزلەرگە چوڭقۇر سالام ،بۇگۇن ئوغلۇم تۇغۇلغانلىقىنىڭ 100كۇنلۇك خاتىرە كۇنىدە سىزنىڭ قول يازمىڭىزنى ئۇقۇپ ،ئوزەمنىڭ دادا بولغانلىقىمدىن تۇلىمۇ پەخىرلەندىم ۋە مەسئۇليىتىمنىڭ سالمىقىنى تۇنۇپ يەتتىم .سىزلەرگە چەكسىز بەخىت تىلەيمەن .

دەرتمەن

	ئېزىز مەلىم . قانداق تەبرىكلەيمىز