بىز تەبرىكلەيدىغان بايرام ئەتە

Erkman

	مېنىڭ چاچ قويماي پات-پات قىردۇرۇپ يۈرىدىغان بېشىدىن دوپپىسىنى ئايرىمايدىغان بىر يۇرتلۇق ساۋاقدىشىم بار ئىدى، ئەمما كېيىنكى كۈنلەردە ئۇ تەقدىر ئۇنى ئۈرۈمچىدىكى ھايات قوينىغا پىرقىرىتىپ چۆرىۋەتتى، تۇرمۇشلۇق بولۇش قىرانىغا يەتكەن كۈنلەردە ئۇ ياخشى كۆرۈپ قالغان بىر قىز ئۇنى چاچ قويۇشقا، دوپپىنى تاشلاشقا قىستىۋىدى، ئۇ بۇنىڭغا كۆندى، تويدىن كېيىن پەرزەنتلىك بولغاندا چاچنى چۈشۈرۈپ يەنە دوپپىدىن بىرنى ئېلىپ كىيدى. ئاخىرى نېمە بولدى دېمەمسىلەر؟ بىر ئوغلى ئانىسىز قالدى، ئۇ قايتا ئۆيلەنمىدى. بالدۇرلا خىزمەتتىن چېكىنىپ كىچىككىنە بىر ئاشخانا ئېچىپ، ياغلىق چېگىدىغان قىزدىن بىرنى ئەمرىگە ئېلىپ تۇرمۇشىنى سېرىقتالراق ئۆتكۈزۈپ كەلمەكتە. دېمەكچىمەنكى، دوپپىلىق يىگىتنىڭ كۆڭلى چۈشكەن قايسى بىر قىز شۇ يىگىتكە ماقۇل بولىدىغاندۇ؟ مۇشۇ مۇنبەردە ياتلىق بولمىغان قىز بولساڭلار  دوپپىنى بېشىدىن ئالمايدىغان يىگىتكە ياتلىق بولامدىغانسىلەر؟ بىز ھەقىقەتەن ھاياجانلىنىشقا ئۇستا كېلىمىز. شۇنداق چىرايلىق قىزلىرىمىز دوپپا كىيگەن يىگىتلەرنى نەزەرىگە ئىلمايدۇ. شەھەردە ياشىغانلار سەھرادىن كەلگەن يىگىتلەرنى ياراتمايدۇ. دۇنيادا بىزدەك ھاكاۋۇر، گىدەيگەك، لاپچى ئادەملەر بولمىسا كېرەك.  گېپىمگە قوشۇلمىساڭلار مېنى تىللىساڭلار بولىدۇ، بىز ھازىر ئەژدادلىرىمىزغا ئوخشىمايۋاتىمىز. تۈنۈگۈن ، بۈگۈن ئىدارىمىز قۇرۇلغانلىقىنىڭ 60 يىللىقى ئۆتكۈزۈلۈۋاتىدۇ، يوغان باشلىقىمىز ئاز سانلىق مىللەت كادىرلىرى دوپپا، كاستۇم-بۇرۇلكا كىيىپ كېلىڭلار، مەركەزدىن كەلگەن باشلىقلار ۋە ئاپتونوم رايون باشلىقلىرى كېلىپ بىرگە سۈرەتكە چۈشىدۇ، دېۋىدى، مەن دوپپامنى كىيىپ كەلدىم، ياپما قاپاق، سېرىق تەنلىكلەرگە خاس تۇرقۇمغا دوپپا تازا يارىشىپ كەتمىسىمۇ كىيىۋالدىم. ئەمما باشقىلار ھەرگىز دوپپا كىيمىدى. پىنسىيەگە چىققان ئىلگىرىكى باشلىقلىرىمىزدىن ئىككىسىلا دوپپا كىيىپ كەپتۇ.