ئۇيغۇر شېئىريىتىدىكى نادىر شېئىرلار 12. سۇنۇق قېلىچ

ayqiz

	سۇنۇق قېلىچ ئابدۇرېھىم  ئابدوللا ئاستىمدا شاقىراپ دەريا ئاقىدۇ ، ئېشىپ بارماقتىمەن بىر تىك داۋاندىن . ئالدىمدا بىر سۇنۇق قېلىچ ياتىدۇ ، بىلمەيمەن يادىكار قايسى زاماندىن . قېلىچنىڭ يېرىمى تۇپراق ئاستىدا ، يېرىمى ئالماستەك تۇرىدۇ چاقناپ . بو قەدىم جەڭلەرنىڭ يالدامىسىنى ، ھاياجان ئىلكىدە ئالدىم ئاۋايلاپ . تىترىدى قوللىرىم تۇنىدى يۈرەك ، ھىلال ئاي ئەگمىسىدەك ئەگرى قېلىچنى . زاتىمنىڭ يىگىتلىرى كەلدى گۈپىلدەپ، بىلمىدىم قايھالدا نەپەس ئېلىشنى . قېلىچنىڭ بىسىدە قوياش جىلۋىسى، بالقىيدۇ ئىپتىخار بالقىيدو زەر نۇر. جاراڭلاپ سونغاچقا جەڭدە ئارمانسىز ، سۈزۈك سۇنىغىدا كۈلىدۇ غورۇر . تاۋلانغان بو قېلچ ئىگىلمەس بولۇپ ، جەسۇرلار ۋەتىنىنىڭ ئوچاقلىرىدا . قەسەم سۈيى ئىچكەن چىقىپ ئوچاقتىن ، ئاھۇ كۆز مەدەتكار بولاقلىرىدا . كەلتۈرگەن قېلىچنى بۇ تىك داۋانغا ، ۋەتەننىڭ سۆيگۈسى جەڭلەرگە چىللاپ . سۇنغان چېغىدىمۇ رىشتى ئۈزۈلمەي ، تەۋەررۇك تۇپراقنى ئاپتۇ قۇچاقلاپ . ئويلىدۇم شۇنداقمۇ قېلىچلار بار ئىكەن ، بىر قېتىم قېنىدىن چىقالمايدىغان . باسسا ياۋ ۋەتەنگە پاسكىنا ئاياغ، قىساس قەھرى بىلەن چاقنىمايدىغان . خىيالچان تىكىلدىم سۇنۇق قېلىچقا ، ئەينەكتەك تىگىدىن كۆروندى جەڭگاھ . بو قېلىچ شىر سۈپەت بىر ئەر قولىدا، دۈشمەنگە ۋەيلۇندىن بەرمەكتە ئاگاھ . چىقىدۇ شىۋىرغان ئوق ئۈزسە ساداق ، ئۇمۇد نىڭ زەربىدە قالقان قالتىرار. تەككەندە گەزلەرشكەن ھەربىر قېلىچقا ، بۇ قېلىچ بىسىدىن چاقناپ يالتىرار. ئاھ... قانداق سۇندى ئۇ قېلىچ ؟، جەڭگاھنى لەرزىگە سالدى شۇ سادا . تاغلاردىن تاغلارغا ئۇرۇلدى ئەكسى، ھەر تاغدا بىر قېلىچ سۇنغاندەك گۇيا . قۇياشمۇ قارايدۇ سۇنغاندا قېلىچ ، زەپەرنىڭ يۈزىىگە تارتىلدى نىقاب . باتۇر ئات ئۈستىدىن غۇلىدى باشسىز ، كىشنىدى دۇلدۇلى زارلىق چىقىراپ. قېنى ئۇ باھادىر، قارىدىم كۆككە، قېنى ئۇ قىلىچقا مۇناسىپ ئەرلەر. قۇياشتىن، نۇرلاردىن ئىزلىدىم ئۇنى . ئۇنىڭدەك ئوغلانىنى يۇتمايدۇ يەرلەر. پەندىيات! قىياغا ئايلىنىپتۇ ئۇ ، قىلىچنىڭ دەستىسى قاپتۇ ئىلكىدە . تەنتەنە قىلىدۇ ئەرلىك جەسۇر، مەرمەردەك يالتىراپ تۇرغان قىپىدە. شەھىدنىڭ بوينىدىن تامچىغان قانلار ، دەرياغا ياقۇتتەك چۈشەر تامچىلاپ. ئوخچىدى يۈزۈمگە دەريانىڭ سۈيى، بىلدىمكى ئۇ مېنى ئالدى قۇچاقلاپ .

Insan

	مۇنۇ شىئېرنىڭ ئاۋازلىق نۇسخسىنى ئاڭلىغاندا تىنىم جۇغۇلداپ كەتكەن، ھازىر بۇنى ئوقۇپمۇ بىر قىسمىلا، شىئېر دىگەنمۇ يامان نىمىكەن جۇما