خام خىيال ۋە رېئاللىق

جۇلالىق

	بىر كىشى باشقىلارنىڭ ئات مىنىشىگە تولىمۇ ھەۋەس قىلىدىكەن ھەمدە ئات مىنىشنى ناھايىتى ئەركىنلىككە ئېرىشكەنلىكتەك،پىيادە يول يۈرۈشنى ئاۋارىچىلىك ۋە زېرىكىشلىك ئىشتەك ھېس قىلىدىكەن. شۇنىڭ بىلەن بىرەيلەن بۇ كىشىگە ئۇنىڭ ئىككى پۇتىنى كېسىپ بەرسە ،ئۇنىڭغا بىر ئات بېرىدىغانلىقىنى ئېيتىپتۇ. بۇ كىشى ھېچ ئىككىلەنمەستىنلا دەرھال ئىككى پۇتىغا بىر ئاتنى تېگىشىپتۇ. ئۇ ئاتقا ئېرىشەلىگەنلىكىدىن ۋە ئات مىنەلىگەنلىكىدىن ھەقىقەتەن ناھايىتى خۇشال بوپتۇ. ئاتنىڭ ئۇچقاندەك چېپىشلىرى ئۇنى خۇددى چۈشىدە پەرۋاز قىلىۋاتقاندەك ھېسسىياتقا كەلتۈرۈپتۈ. ئەمما ئۇ كۈنلەرنىڭ ئۆتۈشى بىلەن ئادەمنىڭ ھەمىشە ئاتنىڭ ئۈستىدىلا يۇرمەيدىغانلىقىنى ھېس قېپتۇ. ئۇ ئاتتىن چۈشمەكچى بولغىنىدىلا، ئاندىن ئۆزىنىڭ ناھايىتى چوڭ خاتالىق ئۆتكۈزگەنلىكىنى بايقاپتۇ. ھېكمەت:ئاتنىڭ بولماسلىقى پەقەت كىچىككىنە ۋە ۋاقىتلىق ئەپسوسلىنىش،ئەمما ئىككى پۇتىدىن ئايرىلىش ئادەم ئۈچۇن ئۆمۈرلۈك ئازاپتۇر. رېئاللىق بىلەن خام خىيال ھەمىشە پەرقلىق بۇلىدۇ.ئادەم خام خىيالغا پېتىپ يۈرمەي،رېئاللىققا يۈزلىنىپ ھاياتتىن ھەقىقىي بەھرىلىنىشى كېرەك. مەنبە: نۇر تورى.

saye

	مەنىسى ھەقىقەتەن چوڭقۇر ھىكايىكەن. بىز شۇنچىلىك خۇش بولۇپ ئېرىشكىنىمىزدە، بىلىپ بىلمەي نىمىلەردىن ئايرىلىپ قېلىۋاتقانلىقىمىزنى چۈشىنىشىمىز كېرەك. ھېس قىلىشىمىز كېرەك. ئەرزىمدۇ يوق؟ بەزىدە شۇكرى قانائەتچانلىق بەندىگە تۈگمەس كۆڭۈل ئارامچىلىقى ۋە خاتىرجەم تۇرمۇش بېرەلەيدۇ.

saye

	يۇقارقى ئىنكاسنى قالدۇرۇپ 10 نەچچە سائەتتىن كېيىن، خام خىيال ۋە رىئاللىق توغرىسىدا يەنە بىر ئويغا كېلىپ قالدىم. ئىنساندا خام خىيالنىڭ بولماسلىقى نىمىدىن دېرەك بېرىدۇ. ئىلگىرلەش ۋە تەرەققىياتنىڭ بولماسلىقىدىن دېرەك بېرەرمۇ؟ تەرەققىيات بىلەن خام خىيالنىڭ مۇناسىۋېتى نىمە؟ مىڭ بىر كېچە چۆچەكلىرىدە دىيىلگەندەك، شۇ دەۋرلەردىكى كىشلەر يول ئازابىدىن جاق تويۇپ، ئۆيلىرىدە گىلەمدە يېتىشىپ، شۇنداق بىر ئۇچار گىلەپ بولسا، قىرىق كۈنلۈك سەپەرنى بىرلا كۈندە بېسىپ بولسا. . . شۇنداق بىر ئەينىكىم بولسا، جاھاندىكى ھەممە ئىشلارنى شۇ ئەينىكىمدىن كۆرۈپ تۇرسام، ئۇنىڭغا جاھاننامە دەپ نام بەرسەم. . . باۋۇدۇن دەپ بىر بالا بولغانىكەن، ئۇ باشقىلارنىڭ ئۆزى تۇتىۋېلىشىدىن قورقۇپ، بېلىقنىڭ قارنىغا كىرىپ سۇ ئاستىغا مۆكۈۋاپتۇ . . . يەنە شۇنىڭدەك مىساللار بىزدە كۆپ . بۇ رىۋايەتلەردىكىنىڭ ھەممىسى ئويدۇرما ئەلۋەتتە، بىر خام خىيال، شۇ دەۋرلەردە خەلق ئۇچراۋاتقان مەلۇم بىر قىيىنچىلىق دەل مۇشۇنداق شېرىن خىيال، چۆچەكلەر بىلەن ئۆز كۆڭۈللىرىنى خۇش قىلغان ۋە باشقىلارغىمۇ زوق ئاتا قىلغان. ئەمدى ئەمىلىيىتىمىزگە قاراپ باقايلى. ئاتا بوۋىلىرىمىزنىڭ ئەشۇ خام خىياللىرىنىڭ پىلتىسىدە، مانا ئاشۇ ئاجايىپلار بىزنىڭ تۇرمىشىمىزدا ئاللىبۇرۇن پەيدا بولدى ئەمەسمۇ. ئۇچار گىلەم دىگىنى ئايروپىلان ئەمەسمۇ، جاھاننامە ئەينىكى ھەممە ئۆيگە ئومۇملاشقان تېلىۋىزور ئەمەسمۇ، بېلىققا سىموۋول قىلىنغىنى ھازىرقى پاراخوتلار ئەمەسمۇ. ئەگەر ئۇشۇ خام خىياللار بولمىسىدى، بىز بەلكىم تولىمۇ شۈكرى قانائەتچانلىق بىلەن تەرەققىياتنى ئىستەك قىلماي، مانا بۈگۈنگىچە تاش قوراللار دەۋرىدىن ئازراقلا ياخشى تۇرمۇش كەچۈرەر ئىدۇق ھەقىچان. خام خىيالنىمۇ ئانچە مۇنچە سۈرۈپ قويايلى. خام خىيال ئۇ بىر ئەمەلگە ئېشىش ئىمكانىيىتى ئۈچۈن بىزدە تىرىشچانلىق ھۈجەيرىلىرىنى ئويغىتالىسا نىمىشقا ئەمەلگە ئاشمىغۇدەك.